المحاضرة الاخيرة

رفع عينه. شافها. مصدقش. دي نيره؟ البنت اللي كانت بتعيط وبتترعش في المدرج؟ كانت بتتكلم عن موضوع هو نفسه كان بيحبه جداً. وبتتكلم بعمق يخلي أي حد يسمعها يحترمها. لما خلصت الناس سقفت لها جامد. هو قام راح لها بعد ما الناس مشيت. قال لها نيره؟ هي بصت له. للحظة عينيها لمعت بالدمعة القديمة بس بسرعة سيطرت على نفسها. ابتسمت ابتسامة رسمية جداً وقالت أهلاً يا دكتور خليل. زيك؟

قال لها مش مصدق انك انتِ. بقيتي مختلفة تماماً. ما شاء الله. قالت له الحياة بتغير يا دكتور. قال لها أنا عاوز اعتذر لك عن اللي حصل في آخر محاضرة. أنا عارف اني كنت قاسي جداً. بس والله كنت مصدوم ومحرج ومكنتش عارف أتصرف. وخفت لو مردتش بقوة الموقف يتكرر مع بنات تانية وتتأذي سمعتك انتِ قبل سمعتي. قالت له محصلش حاجة يا دكتور. انت كان عندك حق في حاجات كتير.

أنا فعلاً كنت صغيرة ومندفعة ومش بفكر غير في اللي حاساه وبس. وانت كنت صح لما قولت اني مركزة في وهم. قال لها لا مكنش وهم. انتِ كنتي صادقة وأنا كنت عارف. بس أنا كنت خايف. خايف من فرق السن اللي انتِ شايفاه بسيط بس هو كان كبير في عيني. خايف من كلام الناس هيقولوا بيستغل طالبة عنده. وخايف من مبادئي اللي اتربيت عليها ان الأستاذ مينفعش يبص لطالبة.

قالت له ودلوقتي؟ قال لها دلوقتي انتِ مبقتيش طالبة. انتِ زميلة. معيدة قد الدنيا وبتعملي ماجستير وبكرة تبقي دكتورة قد الدنيا. وفرق السن اللي كنت شايفه كبير زمان اكتشفت انه مش هو اللي بيبني علاقة. النضج هو اللي بيبنيها. وانا شايف قدامي واحدة ناضجة جداً. نيره سكتت شوية وبصت للبحر من شباك القاعة. قالت له يا دكتور خليل أنا قضيت سنة كاملة بموت كل يوم من كلامك.

بس كل يوم كنت ببني نفسي من جديد. اتعلمت ان الحب مش اني أجري ورا حد واعترف له قدام الناس. الحب اني أبقى قوية وأستاهل الحب ده. أنا دلوقتي مش نفس البنت اللي حبتك من سنة أولى. أنا واحدة تانية بتحب نفسها الأول. قال لها وأنا حبيت الواحدة التانية دي. من أول ما دخلتي القاعة وانا مش قادر أشيل عيني من عليكي.

مش عشان شكلك اتغير بس عشان نظرتك اتغيرت. عيونك بقت فيها ثقة وقوة. ضحكت وقالت انت لسه بتتكلم زي الروايات يا دكتور. قال لها خليل من غير دكتور. لو تسمحي لي. قالت له لسه بدري يا خليل. مشيوا مع بعض على كورنيش إسكندرية. كانوا ساكتين معظم الوقت بس السكوت كان مريح. حكى لها انه بعد ما فسخ خطوبته اكتشف انه كان داخل علاقة غلط وانه كان محتاج يقف مع نفسه.

وحكى لها انه بعد موقفها فضل شهور ضميره بيأنبه وانه كان بيسأل نورهان وأميره عليها من بعيد لبعيد وعرف انها بقت معيدة وفرح لها من قلبه. وهي حكت له عن السنة اللي فاتت. عن العياط والوجع والدراسة والسهر. عن نورهان وأميره اللي فضلوا جنبها. عن ريان اللي سافر ولسه بيبعت لها كل فترة يطمن عليها. وعن يزن اللي خطب نورهان وخلاص هيتجوزوا قريب.